Azərbaycan və Ərəb dövlətləri arasındakı Yaşıl sənaye əməkdaşlığı son illərdə daha da inkişaf edib. Bu sahədə alternativ enerji mənbələrinin yaradılması və eləcə də ağır sənayenin ətraf mühitə zərər vurmadan fəaliyyəti yönündə işlər aparılır.

Azərbaycanla Ərəb dövlətləri Yaşıl Enerji sahəsində hansı layihələr planlaşdırıb?

“Azərbaycan Ərəb dünyası üçün çox vacib “açar ölkə”dir. Bu ölkələr arasında bir çox sahələr üzrə iqtisadi fəaliyyətlər aparılır”.

Bu fikirləri Ednews-a açıqlaması zamanı danışan pakistanlı Mərkəzi Asiya və Yaxın Şərq üzrə ekspert Məhəmməd Əli Paşa bildirib. 

“Son illərdə Yaşıl Enerjinin əsas energetika mənbələrindən birinə çevrilməsi Ərəb dövlətlərinin də bu sahəyə ciddi miqyasda investisiya qoymasına gətirib çıxarıb. Azərbaycan ərazisində geniş təbii-coğrafi müxtəliflik dövlətə bu sahədə bir çox imkanlar tanıyıb.

Birləşmiş Ərəb Əmirlikləri Azərbaycanda 2027-ə qədər iki irihəcmli günəş panelləri yaratmaq üçün Bakı ilə əməkdaşlığa başlayıb. Qlobal əməkdaşlıqda Ərəb dövlətləri artıq təkcə neft və qaz sənayesində əsas iştirakçılar deyil. Davamlı və daha zərərsiz güc sistemləri üçün Yaxın Şərqin zəngin günəş mənbələrindən və Azərbaycanın su mənbələrindən istifadə etmək olar. 

Səudiyyə Ərəbistanı ilə Azərbaycan arasında indiyə qədər bir çox neft sənayesi əməkdaşlığı olub. Yenilənəbilən enerji sahəsində öz potensialını artıran Səudiyyə Ərəbistanı Azərbaycan ərazisində 500 meqavat gücündə günəş panellərinin yerləşdirilməsi üçün razılaşma əldə edib. 

Aran bölgəsində 1.5 qiqavatlıq külək enerjisi panelləri quraşdırılacaq. Bu sahədə karbon sızıntılarının minimuma endirilməsi üçün Səudiyyə Ərəbistanı xüsusi maraqlıdır. Ona görə ki, bu ölkə illərdir atmosferə karbon emissiyalarının yayılmasından əziyyət çəkib”.  

Ekspert Azərbaycanla Ərəb dövlətlərinin Yaşıl Enerji sahəsində əməkdaşlığının əhəmiyyətindən də söz açıb. Onun sözlərinə görə, Ərəb dövlətləri öz iqtisadiyyatlarının neft və qaz sənayesindən asılılığını azaldıblar. 

“Alternativ enerji üzrə ixtisaslaşan bu dövlətlər bundan sonra da Azərbaycana xüsusi diqqət ayıracaqlar. Azərbaycan bundan yararlanaraq enerji sənayesində neft və qaz asılılığını azaltmağa nail ola bilər. Alternativ enerji məhsulları bahadır. Buna görə də xarici investisiyanı yüksək dəyərləndirmək lazımdır. 

Əgər Azərbaycan Ərəb dövlətlərindən alınan investisiyaların hesabına Yaşıl Enerjini dayanıqlı sahəyə çevirə bilsə, ölkə həm ənənəvi, həm də alternativ enerji sektorlarında ixtisaslaşmış model ölkəyə çevriləcək”.

Fərid