İsveçrənin Cenevrə şəhərində 22-25 aprel tarixlərində ilk "Türk Həftəsi" keçiriləcək.

Ednews barədə Türk Dövlətləri Təşkilatına (TDT) istinadən xəbər verir.

"Türk Həftəsi" çərçivəsində türk dünyasının məşhur rəssamlarının rəsm əsərlərindən və əl işlərindən ibarət “Türk Dünyası Sərgisi” təşkil ediləcək.

"Sərgi Türk Dövlətləri Təşkilatı, Beynəlxalq Türk Mədəniyyəti Təşkilatı (TÜRKSOY) və Türk Akademiyasının töhfələri ilə Türk dünyasının zəngin mədəni qobelenlərinə qapı rolunu oynayır. "Türk Dünyası Sərgisi" türk dünyası üzrə fotoları, əl işlərini, rəsm əsərlərinin füsunkar nümayişlərini və “İpək Yolunda Türk Dünyası” fotosərgisini özündə əks etdirən müxtəlif mədəniyyət əsərlərini təqdim edir. Hər bir eksponatda türk xalqlarının mürəkkəb irsi və bədii şücaətinə dair fikirlər təqdim olunur", - təşkilatdan bildirilib.

Qeyd edilib ki, sərgi 3 may 2024-cü il tarixinədək Cenevrədə Sərgi Qalereyasında nümayiş olunacaq.

Qeyd edək ki, bu gün TDT Baş katibi səfir Kubanıçbek Ömurəliyev təşkilata üzv dövlətlərin Cenevrədə akkreditə olunmuş daimi nümayəndələri ilə bir araya gələrək ilk "Türk Həftəsi" tədbiri öncəsi son hazırlıqları müzakirə edib.