Ruslar Ukraynaya qarşı müharibədən əldə etdikləri təcrübədən istifadə edərək pilotsuz uçuş aparatlarını (PUA) və radioelektron mübarizə (REM) vasitələrini aktiv şəkildə təkmilləşdirirlər.  

"EDnyus" xəbər verir ki, bu barədə Müharibə Araşdırmaları İnstitutunun (ISW) son hesabatında bildirilir.
 
Analitiklər qeyd edirlər ki, Rusiya Ukraynadan başqa, NATO-ya qarşı hibrid əməliyyatlarda da ən yeni texnoloji yeniliklərdən istifadə edir.  

İnstitut vurğulayıb ki, ötən il ərzində NATO üzvləri rus hibrid hücumları və diversiya cəhdləri ilə daha çox üzləşiblər. "NATO-ya üzv dövlətlərin Rusiyanın kəşfiyyat dronlarına qarşı tədbirlər görməyə çalışması müdafiə imkanlarının daha da inkişaf etdirilməsinin zəruriliyini göstərir. Çünki Rusiya Ukrayna cəbhəsində qazandığı təcrübəni yeni texnologiyalar yaratmaq üçün istifadə etməyə davam edir", – hesabatda qeyd olunur.  

Rusiyanın Avropadakı dronları  
 Dünən Almaniyada, Ukrayna hərbçilərinin təlim keçdiyi Şvözinq aviabazası üzərində naməlum pilotsuz uçuş aparatları müşahidə edilib. Böyük ehtimalla, Rusiya bu bazanı izləməyə çalışır. Yanvar ayında bu aviabaza üzərində altı dəfə şübhəli dronlar qeydə alınıb. Alman ordusu xüsusi maneə cihazlarından istifadə etsə də, bu dronları yerə endirə və ya operatorlarının yerini müəyyən edə bilməyib.  

Bundan əlavə, məlum olub ki, Rusiya və Böyük Britaniya artıq gizli sualtı "müharibə" aparır. Rusiyaya məxsus "Yantar" adlı casus gəmisinin Britaniya sahilləri yaxınlığında aktivliyi Rusiyanın Qərb ölkələrinə qarşı genişmiqyaslı müharibəyə hazırlaşdığına işarə edir.  

Bundan başqa, sosial şəbəkələrdə yeni rus icadı – FPV-dronun görüntüləri yayılıb. Bu dron kamera ilə təchiz edilib və bambuk çərçivəyə quraşdırılıb.
Mütəxəssislərin fikrincə, belə bir dron magistral yolların yaxınlığında yerləşdirilərək həftələrlə yanından keçən avtomobilləri gizli şəkildə müşahidə edib video görüntülər ötürə bilər.