Konqo Demokratik Respublikasının üsyançılar tərəfindən ələ keçirilmiş Qoma şəhərində 900-dən çox insan həlak olub. 

"EDnyus" xəbər verir ki, Qırmızı Xaç əməkdaşları qoruyucu geyimlərdə cəsədləri toplamağa və basdırmağa çalışsalar da, ölənlərin sayı həddindən artıq çoxdur. Döyüşlərdən bir neçə gün keçməsinə baxmayaraq, meyitlər hələ də yandırıcı günəş altında küçələrdə qalır.
 
 M23 - "Mouvement du 23-Mars" (23 mart hərəkatı) ifadəsinin qısaldılmış formasıdır. BBC məlumatına görə, bu silahlı qruplaşma Konqoda etnik azlıq sayılan tutsilərlə əlaqəlidir. Üsyançılar xalqının bərabər hüquqlara və təhlükəsizliyə malik olması uğrunda mübarizə apardıqlarını iddia etsələr də, Konqo hökuməti bunu fərqli qiymətləndirir. Rəsmilərin fikrincə, M23-ün məqsədi ölkənin zəngin mineral ehtiyatlarına nəzarət etməkdir və bu hücumların arxasında qonşu Ruanda hökuməti dayanır.

BMT ekspertləri də Ruandanın bu münaqişədə rol oynadığı fikrini dəstəkləyir. BMT-nin məlumatına görə, hazırda təxminən 4000 ruandalı əsgər Konqo ərazisində M23-lə birgə döyüşlər aparır. Bu birgə qüvvələr Qoma şəhərini ələ keçiriblər. Toqquşmalar nəticəsində ən azı 17 BMT sülhməramlısı həlak olub.

Konfliktin daha da böyüməsinin qarşısını almaq üçün bu həftənin cümə və şənbə günləri Tanzaniyanın Dar-əs-Salam şəhərində fövqəladə regional sammit keçiriləcək. Görüşdə Konqo prezidenti Feliks Çisekedi və Ruanda prezidenti Pol Kaqame iştirak edəcək. Keniya və Uqanda danışıqlarda vasitəçi qismində çıxış edəcək.

Bu regionda onilliklərdir ki, davam edən qanlı müharibələr gedir. Toqquşmalarda uşaq əsgərlərdən də istifadə olunur. Münaqişələrin əsas səbəbi nadir və qiymətli minerallar - koltan, qızıl, nikel, kobalt və mis yataqları uğrunda gedən mübarizədir.