NATO Baş katibi dünya liderlərini Ukraynaya dəstəyi azaltmağa yox, gücləndirməyə çağırıb.

"EDnyus" xəbər verir ki, bunu NATO-nun Baş katibi Mark Rutte Davosda keçirilən Dünya İqtisadi Forumunda Ukrayna mövzusuna həsr olunmuş tədbirdə deyib.

“Ukrayna məsələsində ABŞ-nin də iştirakına ehtiyacımız var. Əgər yeni Tramp administrasiyası öz müdafiə sənaye bazasından Ukraynaya dəstəyi davam etdirməyə hazırdırsa, mən tam əminəm ki, xərcləri avropalılar ödəyəcək. Biz bunu etməyə hazır olmalıyıq. Biz səylərimizi artırmalı və Ukraynaya dəstəyi azaltmamalıyıq”, - Baş katib bildirib.

Mark Rutte müharibənin trayektoriyasını dəyişdirməyin vacib olduğunu diqqətə çatdıraraq cəbhə xəttinin yanlış istiqamətdə hərəkət etdiyi barədə xəbərdarlıq edib.

Onun sözlərinə görə, bunu etmək üçün üç mühüm səbəb var: “Birincisi, Ukraynanın özü üçün. Biz 21-ci əsrdə bir ölkənin digər ölkəni işğal etməsinə və onu müstəmləkə etməyə cəhd etməsinə icazə verə bilmərik. İkincisi, ona görə ki, Çin, Şimali Koreya, İran və Rusiya birgə işləyir. Yanlış razılaşma Rusiya Prezidentinin Şimali Koreya, İran və Çin liderləri ilə “afərin” deməsi deməkdir. Üçüncüsü, ona görə ki, Ukrayna müharibəni uduzsa, NATO üzvləri öz ordusunu gücləndirmək üçün trilyonlarla əlavə xərclə üzləşəcəklər ki, bu da bu gün nəzərdə tutulduğundan çox-çox daha yüksəkdir”.

Rutte əlavə edib ki, Ukraynanın NATO-ya üzv olacağına dair öhdəlik var: “Əgər Vladimir Putin danışıqlar masasına gətirilə bilərsə, vacib olan davamlı sülhü təmin etməkdir. Bunun davamlı olması üçün biz əmin olmalıyıq ki, Putin gələcəkdə  Ukraynanın bir kvadrat kilometrini də almağa cəhd etməyəcək”.