Fransa Baş naziri Mişel Barnyenin istefasından sonra müxalifət prezident Emmanuel Makronun da istefa verməsini tələb edib.

EDnews-un məlumatına görə, müxalifət ölkədə yaranan siyasi böhrana görə Makronun məsuliyyət daşıdığını bildirib.

“İtaətsiz Fransa” partiyasının parlament fraksiyasının lideri Matilda Pano növbədənkənar seçkilərin keçirilməsinin zəruri olduğunu bildirib. “Xaosun günahkarı biz deyil, 7 ildir ölkəyə rəhbərlik edən Emmanuel Makrondur. Növbədənkənar prezident seçkiləri lazımdır”, - deyə o bildirib.

Fransa mətbuatında yer alan məlumata görə, sorğularda da xalq Makronun istefa verməsini tələb edir. “Cluster 17”nin apardığı sosial sorğuda qeyd edilir ki, fransızların 50 faizi Makronun istefasını istəyir.

Sorğuya görə, fransızlar Mişel Barnye hökumətinə senzura tətbiq edilməsi ilə bağlı ciddi fikir ayrılığına malikdirlər. Bu, partiyaların öz seçicilərini birləşdirə bilməməsini əks etdirir. Fransızların 36%-i düşünür ki, hökumətə qarşı senzura prezident E.Makronun Baş nazir təyin etməkdə səhv seçim etməsindən qaynaqlanır.

Qeyd edək ki, Fransada bir çox sahənin işçiləri yeni büdcədən narazıdır. Dəmiryolçular və təsərrüfat işçilərindən sonra dövlət qulluqçuları, məktəblər, xəstəxanalar, energetika və hava yolları işçiləri də tətilə başlayır. Onlar 2025-ci il büdcə layihəsində qənaət tədbirlərinə qarşı çıxır, dövlət qulluğu üçün daha çox insan və maliyyə resursları tələb etmək üçün nümayişlər planlaşdırılır.

Makron ötən gün televiziya ilə xalqa müraciət edib və tezliklə müasir Fransa tarixinin ən qısa müddətli baş naziri olan Barnierin varisini təyin edəcəyini bildirib.

O, prioritet məsələnin gələn ilin büdcəsi olduğunu deyib. Qeyd edək ki, Fransa parlamenti hələlik hökumətin təqdim etdiyi büdcəni təsdiqləməyib.

Makron siyasi böhrana görə məsuliyyət daşıdığını inkar edib. Mərkəzçi partiyanı təmsil edən prezident bildirib ki, ifrat sağçı və solçu partiyalar Barnieri hakimiyyətdən kənarlaşdırmaqla “qarışıqlıq” yaratmaq üçün “anti-respublika cəbhəsində” birləşiblər.

O, istefa ilə bağlı çağırışlara müqavimət göstərib və 2027-ci ilin mayında səlahiyyət müddəti başa çatana qədər vəzifəsində qalacağını bir daha təsdiqləyib. “Sizin mənə verdiyiniz mandat 5 ildir və mən onu sona qədər yerinə yetirəcəyəm”, - Makron qeyd edib.

Yeri gəlmişkən "Le Parisien" qəzeti yazır ki, Macron cümə axşamı Fransa mediası tərəfindən Barnierin mümkün varisi kimi qeyd edilən Fransua Bayrou ilə nahar edib.