ABŞ Hərbi Hava Qüvvələrinin İranın nüvə obyektlərinə zərbə endirməsindən sonra minlərlə Nyu-York sakini müharibə əleyhinə genişmiqyaslı etiraz aksiyaları üçün küçələrə çıxıb. Nümayişlər vətəndaş cəmiyyətinin Yaxın Şərqdə gərginliyin kəskin artmasına cavabı olub.

“EDnews” xəbər verir ki, bu barədə "NBS News" telekanalı məlumat verib.

Məlumata görə, etiraz hərəkatının episentri Manhettenin ürəyi və ABŞ mədəniyyətinin simvollarından biri olan məşhur Tayms-Skver olub. Oxşar etirazlar ABŞ-nin bir çox şəhərlərinə də yayılıb və vətəndaşların Donald Tramp Administrasiyasının xarici siyasətindən artan narazılığını ifadə edib.

Telekanalın yaydığı kadrlarda Nyu-York küçələrini dolduran yüzlərlə nümayişçi əks olunub. Etirazçılar əllərində "Stop the war on Iran" ("İranda müharibəni dayandırın") və "Trump is a war criminal" ("Tramp hərbi cinayətkardır") şüarları yazılmış plakatlar tutublar. Aksiyanın bir çox iştirakçıları ABŞ-nin hərəkətlərinin genişmiqyaslı hərbi münaqişəyə səbəb ola biləcəyindən və bunun da gözlənilməz nəticələrə gətirib çıxaracağından narahatdırlar.

Xatırladaq ki, iyunun 22-nə keçən gecə ABŞ Prezidenti Donald Tramp İrana qarşı hərbi əməliyyat elan edib. ABŞ Hərbi Hava Qüvvələri İranın üç əsas nüvə obyektinə hücum edib. Əsas hədəf yerin dərinliklərində yerləşən və strateji obyekt olan Fordo uranın zənginləşdirilməsi zavodu olub. Onun sentrifuqaları yüz metrlik qaya və qalın dəmir-beton təbəqə ilə qorunur ki, bu da uzun müddət mümkün hava hücumlarından etibarlı müdafiə hesab edilib.