Mayın 7-i Ümummili lider Heydər Əliyevin anadan olmasının 102 ili münasibətilə "Azərbaycan-Türkiyə nəqliyyat və kommunikasiya əlaqələri dünəni, bu günü və sabahı" adlı elmi seminar keçirildi.
Tədbiri giriş sözü ilə açan Nəqliyyat eksperti Aslan Əsədov Azərbaycan ilə Türkiyə arasında formalaşmış strateji tərəfdaşlığın mühüm sütunlarından birinin nəqliyyat və kommunikasiya sahəsində əməkdaşlıq olduğunu qeyd etdi. Ardınca, Azərbaycan Respublikası Milli Məclisinin VI və VII çağırış deputatı Vüqar İskəndərova çıxış üçün söz verildi.
"Azərbaycan-Türkiyə münasibətləri təkcə tarixi, mədəni və qardaşlıq bağları ilə deyil, həm də strateji əməkdaşlıqla möhkəmlənmiş kompleks münasibətlər sistemidir. Xüsusilə nəqliyyat və kommunikasiya sahəsində həyata keçirilən birgə layihələr – Bakı-Tbilisi-Qars dəmir yolu, Zəngəzur dəhlizi və Transxəzər Beynəlxalq Nəqliyyat Marşrutu regionun iqtisadi inteqrasiyası və geosiyasi əhəmiyyətinin artmasında mühüm rol oynayır".
Davamında, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinin (AYNA) Kommunikasiya departamentinin rəhbəri Vəli Məmmədov çıxış etdi. O bildirdi ki, AYNA olaraq əsas məqsəd, həm yerli, həm də beynəlxalq marşrutlarda daşımaların təhlükəsiz, səmərəli və müasir texnologiyalarla təmin edilməsidir. Azərbaycan-Türkiyə əməkdaşlığı çərçivəsində yeni nəqliyyat dəhlizlərinin inkişaf etdirilməsi, rəqəmsal logistik platformaların yaradılması və süni intellekt texnologiyalarının tətbiqi yaxın gələcəkdə sektorda dönüş nöqtəsi olacaq. Eyni zamanda, Zəngəzur dəhlizi layihəsinin reallaşması bu istiqamətdə əməkdaşlığın miqyasını daha da genişləndirəcək.
Tədbir zamanı Azərbaycan Avtomobil Dilerləri Assosiasiyasının icraçı direktoru Eyyub Əliyev, Azərbaycan Beynəlxalq Avtomobil Daşıyıcıları Assosiasiyanın (ABADA) nümayəndəsi Pərvin Quliyev, Nəqliyyat eksperti Rauf Ağamirzəyev və şair-jurnalist Abil İslam Türkiyə-Azərbaycan əlaqələri, nəqliyyatın iqtisadiyyatın aparıcı qüvvəsi olduğu və Ümummilli Lider Heydər Əliyevin uğurlu siyasətindən bəhs edərək, fikirlərini bölüşdülər.
Tədbirin sonunda xatirə fotosu çəkildi.
Aytac Kərimova//EDnews
