ANAMA yanında İctimai Şuranın sədri Umud Mirzəyev və üzvləri Musa Mərcanlı, Hafiz Əzimzadə, Rey Qasımov və Nadir Cəfərov Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanovla birgə regionu ziyarət ediblər.

Səfərin məqsədi işğaldan azad edilmiş ərazilərdə Agentlik tərəfindən icra edilən humanitar minatəmizləmə fəaliyyətinin gedişatı və maarifləndirmə fəaliyyəti istiqamətində aparılan işlərlə tanışlıq olub. 

İki gün davam edən səfər çərçivəsində nümayəndə heyəti Qazax rayonunda icra edilən minatəmizləmə əməliyyatlarına baxış keçirib, rayon ərazisində partlayıcı sursatların təhlükəsinə dair xəbərdaredici-maarifləndirici lövhələrin quraşdırılması prosesində iştirak edib.

Daha sonra nümayəndə heyəti Agentliyin Göygöl Regional Təlim Mərkəzinə səfər edərək orada yaradılan şəraitlə tanış olub və Agentlik tərəfindən Azərbaycan Respublikası Fövqəladə Hallar Nazirliyi və Azərbaycan Respublikası Daxili İşlər Nazirliyinin Daxili Qoşunları əməkdaşlarına keçirilən “Humanitar Minatəmizləmə” və “Döyüş sahəsinin təmizlənməsi” üzrə təlim prosesini izləyib. 

İşğaldan azad edilmiş ərazilərə səfər çərçivəsində Agentliyin İdarə Heyəti sədrinin başçılıq etdiyi nümayəndə heyəti Ağdərə rayonu ərazisində humanitar minatəmizləmə fəaliyyətinə cəlb edilən Beynəlxalq Avrasiya Mətbuat Fondunun İcma Mina Aksiyası komandasının icra etdiyi əməliyyatlara baxış keçirib. 

Həmçinin, heyət ANAMA-nın Laçın rayonunda yerləşən mobil bazasına baş çəkib, orada yaradılan şəraitlə yaxından tanış olaraq, şəxsi heyətlə görüş keçirib.