Harvard Universitetinin alimləri 30 illik araşdırma sayəsində daha yaşlı yaşlarda sağlam olmaq üçün necə yemək lazım olduğuna dair vacib məlumatları paylaşıblar.
Yaxşı yeməyə nə qədər tez başlasanız, sonrakı həyatda bir o qədər sağlam olacaqsınız! Yeni bir araşdırmaya görə, gənc yaşda yaxşı qidalanma, sonrakı həyatda həm fiziki, həm də zehni olaraq sağlamlığınızı yaxşılaşdırır.
30 İLLİK TƏDQİQAT
Harvard Universitetinin alimləri 106 mindən çox iştirakçını əhatə edən 30 illik araşdırma aparıblar. Araşdırmada 70 min 467 qadın və 36 min 464 kişi iştirak edib.
1986-cı ildə tədqiqatın başlanğıcında iştirakçılar ən azı 39 yaşında idi və heç birində xroniki xəstəliklər yox idi.
YALNIZ 9 FAİZİ SAĞLAMDIR
Uzunmüddətli araşdırmanın bir hissəsi olaraq, iştirakçılar 1986-2010-cu illər arasında hər dörd ildən bir öz yemək vərdişlərini hərtərəfli şəkildə bölüşdülər. Harvard tədqiqatçıları hər bir iştirakçının 8 yüksək qidalı pəhrizə nə qədər uyğun gəldiyini öyrənmək üçün onların pəhrizini izlədilər.
2016-cı ildə iştirakçıların təxminən yarısı öldü və yalnız 9 faizi sağlam həyat sürməyə davam etdi.
“SAĞLAM YAŞLANMA” NƏDİR?
Tədqiqatçılar "sağlam qocalmanı" ən azı 70 yaşa qədər yaşamaq, yaxşı idrak funksiyasına, psixi sağlamlığa, fiziki fəaliyyətə malik olmaq və diabet kimi xroniki xəstəliklərdən azad olmaq kimi şərh ediblər.
Sağlam qidalanan iştirakçıların yaxşı fiziki vəziyyətdə olma ehtimalının 43-84 faiz daha çox olduğu ifadə edildi.
NƏ YEMƏK LAZIMDIR?
Tədqiqat meyvə və tərəvəz, tam taxıl və doymamış yağlarla zəngin pəhrizin onilliklər sonra da yaxşı bir həyat vəd etdiyini bildirir.
Daha çox trans yağ, natrium, qırmızı və emal olunmuş ət istehlak edən insanlarda sağlam yaşlanma ehtimalı daha az olub.
Təbii ki, bu tədqiqatın məhdudiyyətləri var. Əksər qidalanma tədqiqatlarına bənzər olaraq, bu tədqiqat iştirakçıların müşahidə və öz hesabatlarına əsaslanır.
Bu, sağlam qidalanmaya ciddi şəkildə riayət etməyin daha uzun ömür və ya daha sağlam qocalmağa səbəb olacağını sübut etmir.
Harvard İctimai Sağlamlıq Məktəbinin tədqiqatçısı Anne-Julie Tesier, araşdırmanın hələ bir jurnalda dərc edilmədiyini, lakin hazırda ekspert rəyində olduğunu söylədi.
Xəyal Ramiz
