Azərbaycan Prezidenti İlham Əliyevin Antalya Diplomatiya Forumunda iştirakı Türkiyə ilə Azərbaycan arasında sarsılmaz qardaşlığın və strateji tərəfdaşlığın parlaq təzahürü oldu.

“EDnews” xəbər verir ki, bunu Trend-ə türkiyəli politoloq Selin Şenocak 4-cü Antalya Diplomatiya Forumu çərçivəsində bildirib.

“Bu dəyərli iştirak təkcə ikitərəfli münasibətlərin dərinliyini vurğulamır, eyni zamanda beynəlxalq arenada ölkələrimizin eyni diplomatik baxış açısını bölüşdüyünü nümayiş etdirir. Azərbaycanın belə yüksək səviyyəli tədbirdə iştirakı, bütövlükdə regionun gələcəyinə təsir etməyə qadirdir və bu “iki dövlət bir millət” prinsipinin real siyasətdəki gücünü birdaha təsdiq edir”, - deyə o vurğulayıb.

Şenocaq bildirib ki, Türkiyə və Azərbaycan arasında olan strateji müttəqiflik təkcə tarixi-mədəni yaxınlığa yox, həm də təhlükəsizlik və regional inkişaf məsələləri ilə bağlı ümumi anlayışa əsaslanır.

“Bu tərəfdaşlıq ən aydın şəkildə müdafiə sənayesi sahəsində özünü büruzə verir – bu, əməkdaşlığın ən konkret və dinamik inkişaf edən sahəsidir. Son illər ərzində birgə təlimlər, texnologiyaların mübadiləsi, müdafiə sistemlərinin istehsalı və yüksək texnologiyalı platformaların hazırlanması hər iki ölkənin müdafiə qabiliyyətini əhəmiyyətli dərəcədə gücləndirib və onların regional çəkindirmə gücünü artırıb. “Bayraktar” pilotsuz uçuş aparatları və zirehli sistemlər kimi layihələr bu əməkdaşlığın effektivliyinin bariz nümunələrinə çevrilib.

Gələcəkdə bu tərəfdaşlığın daha yüksək mərhələyə qalxacağı — birgə elmi-tədqiqat mərkəzlərinin yaradılacağı, süni intellekt və kibertəhlükəsizlik əsasında müdafiə texnologiyalarının hazırlanması istiqamətində addımların atılacağı gözlənilir. Müdafiə sənayesi sahəsində inteqrasiya yalnız ikitərəfli münasibətlərin dərinləşməsinə deyil, həm də Türk Dövlətləri Təşkilatı çərçivəsində kollektiv təhlükəsizlik anlayışının möhkəmlənməsinə töhfə verəcək. Bu kontekstdə Türkiyə-Azərbaycan tərəfdaşlığı qardaş ölkələr arasında müdafiə sahəsində həmrəyliyin lokomotivi kimi çıxış etməyə davam edəcək,”-deyə türk politoloq bildirib.

Şenocaq onu da qeyd edib ki, Türkiyə və Azərbaycanın Cənubi Qafqazla bağlı ümümi görüşləri təkcə sülh və sabitliyin təmin olunmasına deyil, həm də regionun iqtisadi inkişafının təşviqina yönəlmiş strateji ittifaqa çevrilib.

“Bu iki qardaş ölkə enerji marşrutları və nəqliyyat dəhlizlərindən tutmuş müdafiə və diplomatiya sahəsində əməkdaşlığa qədər çoxşaxəli inteqrasiya prosesi həyata keçirirlər. Bu yanaşma, xüsusilə də Zəngəzur dəhlizi kimi layihələr vasitəsilə bütün Cənubi Qafqaz üçün yeni geo-iqtisadi memarlıq formalaşdırır və regionu Avrasiyanın mühüm mərkəzinə çevirir.

Türkiyə ilə Azərbaycan arasındakı tərəfdaşlıq təkcə Cənubi Qafqazın sabitliyi və rifahına deyil, bütün türk dünyasına töhfə verir. Bu ittifaq Türk Dövlətləri Təşkilatının institusional dərinliyini gücləndirir və türk coğrafiyası üçün güclü siyasi və iqtisadi cazibə mərkəzi formalaşdırır. Sülhün qarantı, inkişafın lokomotivi və həmrəyliyin rəmzi olan bu strateji tərəfdaşlıq regionda uzunmüddətli sabitliyin möhkəm təməli kimi çıxış edir,” - deyə o, sonda qeyd edib.