Türkiyənin Xarici İqtisadi Əlaqələr Qurumu-DEİK-in “Biznes diplomatiyası” jurnalında Azərbaycanın iqtisadi və investisiya imkanları barədə geniş məqalə dərc edilib.

 “EDnews” xəbər verir ki ,  “Azərbaycan: fürsətlər ölkəsi” sərlövhəsi ilə dərc edilən yazı ölkəmizin Türkiyədəki ticarət nümayəndəliyinin məlumatları əsasında hazırlanıb.

Məqalədə qeyd edilib ki, Azərbaycan azad ticarət sazişləri, vergi güzəştləri və uzunmüddətli maliyyə imkanları ilə geniş fürsətlər təqdim edir. Zəngin tarixə və mədəniyyətə malik Azərbaycan təqdim etdiyi strateji üstünlüklər, sürətlə inkişaf edən müasir iqtisadiyyatı və əhatəli təşviq mexanizmləri ilə iş adamları üçün cəlbedici mərkəzə çevrilib. Bu təşviqlər vergi üstünlükləri və digər dövlət dəstəkləri sayəsində Azərbaycan investorlar üçün uzunmüddətli qazanc vəd edən sərmayə mühiti yaradır.

“Strateji mövqe və nəqliyyat şəbəkəsi”, “Güclü iqtisadi struktur və münasib investisiya mühiti”, “280 milyon əhalini əhatə edən bazara çıxış”, “İnvestor dostu siyasət və təşviqlər” kimi bir çox yarımbaşlıqla dərc edilən məqalədə bildirilir ki, Şimal-Cənub və Şərq-Qərb nəqliyyat dəhlizlərinin, eyni zamanda Orta Dəhlizin üzərində yerləşən Azərbaycan hava, dəniz, quru və dəmir yolu infrastrukturu sayəsində regional və beynəlxalq bazarlara çıxış baxımından böyük imkanlar yaradır. 1995–2023-cü illər arasında Azərbaycana qoyulan ümumi sərmayə 341 milyard dolları keçib ki, bunun da 171 milyard dolları xarici investisiyalardır. Həmçinin, 2015-ci ildən bəri manat-dollar məzənnəsi 1,7 səviyyəsində sabit qalaraq iqtisadi sabitliyi dəstəkləyib. On ölkə ilə imzaladığı azad ticarət sazişləri sayəsində Azərbaycan üzərindən ümumilikdə 280 milyon nəfərlik bazara birbaşa çıxış mümkündür. Ölkə “İnvestisiya fəaliyyəti haqqında” Qanunu ilə investorların hüquq və azadlıqlarını təmin edərkən, iş adamları üçün müxtəlif təşviq mexanizmləri təqdim edir. Sənaye parkları və məhəllələri, eləcə də azad iqtisadi zonalarda fəaliyyət göstərən investorlar üçün əhatəli vergi və gömrük güzəştləri mövcuddur. Bundan əlavə, Azərbaycan investorlarına müxtəlif maliyyə dəstək mexanizmləri və fərqli sahələrdə geniş layihə imkanları da təklif edir.

Yazıda bildirilir ki, Azərbaycan və Türkiyə arasında imzalanmış Preferensial Ticarət Sazişi çərçivəsində iki ölkə arasında 30 məhsul növü üçün gömrüksüz ticarət imkanı yaradılıb. Həmçinin, sərhəd ticarətinin inkişaf etdirilməsi, iş adamları arasında əlaqələrin və kommunikasiyanın asanlaşdırılması, tranzit keçidlərin sürətləndirilməsi üçün lazımi tənzimləmələr həyata keçirilir.

Məlumat olaraq bildirilib ki, hazırda dünyanın beş ölkəsində Azərbaycanın ticarət nümayəndəlikləri fəaliyyət göstərir. Xarici ölkələrdəki ticarət nümayəndəlikləri Azərbaycanın müvafiq ölkələrlə iqtisadi-ticarət əlaqələrinin genişləndirilməsi və bu sahədə maraqlarının qorunması, həmin ölkələrə mal və xidmətlərin ixracının artırılması, eləcə də ölkəmizin biznes mühitinin və investisiya imkanlarının təbliği istiqamətində çalışır. Ticarət nümayəndəlikləri İqtisadiyyat Nazirliyinin strukturuna daxil olmaqla, təmsil olunduqları ölkələrdə Azərbaycanın səfirlikləri və baş konsulluqlarının dəstəyi ilə fəaliyyət göstərir. Belə nümayəndəliklərdən biri də 2023-cü ilin iyun ayından etibarən ölkəmizin ən böyük iqtisadi-ticarət tərəfdaşlarından biri olan qardaş Türkiyənin İstanbul şəhərində fəaliyyətə başlayıb. “Xarici sərmayə haqqında düşünürsünüzsə, sizə yad olmayan Azərbaycana gəlin” şüarı ilə fəaliyyət göstərən nümayəndəlik türkiyəli iş adamlarının ölkəmizə investor qismində cəlb edilməsi ilə yanaşı, Azərbaycanın mal və xidmətlərinin Türkiyədə tanıdılması və ixracının stimullaşdırılması istiqamətində də mütəmadi tədbirlər həyata keçirir.

Qeyd edək ki, çap və elektron formatda dərc edilən DEİK-in “Biznes diplomatiyası” jurnalı ölkənin ən nüfuzlu mətbu orqanıdır.

Fatimə Mərdanlı // EDnews