Ombudsmanın Milli Preventiv Mexanizminin (MPQ) üzvləri tərəfindən Dövlət Miqrasiya Xidmətinin Bakı şəhərində yerləşən Qanunsuz Miqrantların Saxlanılması Mərkəzinə və Yevlax rayon Müvəqqəti Yerləşdirmə Mərkəzinə növbəti monitorinqlər həyata keçirilib.
“EDnews” xəbər verir ki, Bu barədə Ombudsman Aparatı tərəfindən yayımlanıb.
Bildirilir ki, başçəkmələr BMT-nin “İşgəncəyə və digər qəddar, qeyri-insani və ya alçaldıcı rəftar və ya cəza əleyhinə” Konvensiyasının Fakültativ Protokolu və “Ombudsman haqqında” Konstitusiya Qanunu əsasında təşkil olunub. Monitorinqlərin əsas məqsədi əcnəbilərin saxlandığı müəssisələrdə onlara təqdim olunan şəraitin və rəftarın qiymətləndirilməsi, daxil olmuş müraciətlərin araşdırılması, sənədləşdirmənin vəziyyətinin öyrənilməsi və ötən ildə müəyyənləşdirilmiş nöqsanların aradan qaldırılması istiqamətində görülmüş tədbirlərin qiymətləndirilməsi olub.
Bakı şəhərindəki Saxlanma Mərkəzində keçirilən monitorinq zamanı MPQ nümayəndələri yaşayış sahələri, tibb məntəqəsi, yeməkxana və digər inzibati binalara baxış keçiriblər. Həmçinin mərkəzdə saxlanılan bir sıra şəxslərlə konfidensial şəkildə görüşlər təşkil olunub. Bu zaman bəzi saxlanılan şəxslər tərəfindən saxlanma şəraiti və rəftarla bağlı narazılıqlar səsləndirilib, tibbi xidmət və dərman təminatı ilə bağlı müəyyən çatışmazlıqların mövcudluğu qeyd olunub. Eyni zamanda məlum olub ki, müəssisədə psixoloq ştatı nəzərdə tutulsa da, həmin vəzifə üzrə xidmət aktiv şəkildə həyata keçirilmir.
Yevlax rayon Müvəqqəti Yerləşdirmə Mərkəzinə keçirilən başçəkmə zamanı isə daha əvvəl aşkarlanmış bəzi çatışmazlıqların aradan qaldırıldığı müşahidə edilib. Bununla yanaşı, mərkəzdə tibb işçisinin olmaması və psixoloq otağının təchizatında çatışmazlıqların mövcudluğu da müəyyən olunub.
Monitorinqlər nəticəsində müəssisə rəhbərliyi ilə hüquqi maarifləndirici söhbətlər aparılıb, saxlanma şəraiti və rəftar standartlarının yaxşılaşdırılması ilə bağlı tövsiyələr verilib. Toplanmış müşahidələr və təkliflər əsasında Dövlət Miqrasiya Xidmətinə rəsmi müraciət ediləcək.
Şəms Qasımlı // EDnews
