Yaxın Şərqdə gərginlik artmaqda davam edir. İsrail Yəmənin Səna Beynəlxalq Hava Limanına zərbə endirib.

EDnews, The Times of Israel-ə istinadən xəbər verir ki, İsrail müdafiə naziri İsrael Katz zərbənin husilərin istifadəsində olan son təyyarəni məhv etdiyini açıqlayıb.

Nazirin sözlərinə görə, bu əməliyyat İsrail Hərbi Hava Qüvvələri tərəfindən həyata keçirilib və Səna hava limanı hədəf alınıb. Katz bəyan edib ki, mayın 6-da həyata keçirilmiş əvvəlki hava hücumları nəticəsində də bir neçə təyyarə məhv edilmişdi. Son zərbə ilə husilərin hava imkanları tamamilə sıradan çıxarılıb.

"Bu, aydın mesajdır və qurduğumuz siyasətin davamıdır: İsrailə hücum edən hər kəs bunun bədəlini ağır ödəyəcək" – deyə İsrail Katz vurğulayıb.
Müdafiə naziri əlavə edib ki, Yəməndəki limanlar və strateji obyektlər, xüsusilə də Səna hava limanı və ətrafındakı infrastruktur, husi qruplaşmalarının nəzarətində olduğu müddətdə dəfələrlə hədəfə çevriləcək.

"Husi terror təşkilatı dediyimiz kimi dəniz və hava blokadası altında olacaq. Bizə zərər verənlər yeddi qat qarşılıq görəcək" – deyə Katz sərt mesaj verib.
Bu hadisə, İsrailin Husi hərəkatına qarşı birbaşa hərbi əməliyyatlar apardığını açıq şəkildə göstərən nadir nümunələrdən biri kimi qiymətləndirilir. Həmçinin, bölgədəki münaqişənin regional və beynəlxalq ölçülərə çıxma ehtimalını artırdığı ehtimal edilir.

Fatima Şükürova // EDnews