Ermənistan parlamentinin spikeri Alen Simonyan Azərbaycan kəndlərinin tezliklə Azərbaycana qaytarılmalı olduğunu bildirib. Bu kəndlərin həmişə Azərbaycana aid olduğunu bildirən Simonyan, Rusiyanın İrəvandakı Zvarnots hava limanında nəzarətini aradan qaldırmağa çalışır.
Mövzu ilə bağlı Ednews-a açıqlama verən politoloq İlyas Hüseynov avqust ayında Rusiya hərbçilərinin Zvarnots hava limanından çıxarılacağını düşündüyünü bildirib:
“Rusiya əsgərlərinin Zvartnots hava limanından çıxarılması Ermənistanın son dövrlərdə əsas məqsədinə çevrilib. Suveren bir dövlətin hava limanının başqa bir dövlətin hərbçiləri tərəfindən qorunması absurd məsələdir. Bu, dövləti heç də müstəqil nümayiş etdirmir. Mən də düşünürəm ki, avqust ayının 1-də Rusiya hərbçiləri Ermənistan hava limanını tərk edəcək. Ermənistan həm də, bununla başqa siyasi bir mərhələyə keçid əldə edəcək.
Rusiyanın Ermənistanda təsirini azaltmaq üçün atılacaq növbəti addım isə, Rusiya hərbçilərinin Ermənistanın sərhəd ərazilərindən çıxarılması olacaq. Burada əsas məqsəd 102-ci hərbi bazanı ölkə ərazisindən çıxarmaqdır. Ermənistanın xaricdəki nümayəndələri də ən çox bunu istəyirlər. Şübhəsiz Rusiya ilk növbədə Ermənistana qarşı iqtisadi təsir gücündən istifadə edəcək”.
Ermənistanın yeni bir siyasi dövrə qədəm qoyduğunu bildirən siyasi ekspert Azərbaycan kəndlərinin tezliklə qaytarılmalı olduğunu qeyd edib:
“Anklav və eksklavlar məsələsinə gəldikdə isə, bu ərazilər tezliklə Azərbaycana qaytarılmalıdır. Azərbaycan ərazisinə bitişik olan Qazaxın 4 kəndi, digər 3 kənd və Naxçıvan Muxtar Respublikasının Sədərək rayonunun Kərkik kəndi də danışıqlar predmetidir. Ümid edirəm ki, bu ərazilər Azərbaycana danışıqlar və sülh yolu ilə qaytarılacaq.
Ermənistan baş naziri Nikol Paşinyan və ölkə parlamentinin spikeri Alen Simonyanın da bildirdiyi kimi bu kəndlərə vizual olaraq Azərbaycan nəzarət edir. Ermənistan artıq bu regionların Azərbaycana aid olduğunu təsdiqləyib. Bu halda, Ermənistan bu kəndləri Azərbaycana qaytarmalıdır. Bunun danışıqlar yolu ilə baş tutması daha yaxşı olar, çünki hazırda Ermənistanın daxili məsələləri heç də sabit deyil”.
Fərid Axund
