Rusiya XİN – in sözçüsü və mətbuat departamentinin direktoru Mariya Zaxarova ötən gün çox biabırçı bir açıqlama ilə yadda qalıb:
“Rusiyanın “yeni regionlarında” seçkilərlə bağlı bəyanatı ilə əlaqədar Rusiyanın Azərbaycana diplomatik demarş bildirdiyini açıqlayıb. Biz bu məsələ ilə bağlı hər şeyi ifadə etmişik".
Görünür, Azərbaycan XİN – in Rusiya tərəfindən Ukraynanın işğal edilmiş ərazilərində keçirilən seçkilərin qeyri – legitimliyə ilə bağlı açıqlamaları, xanım Zaxarovanın xətrinə toxunub.
“Biz ondan çıxış edirik ki, Bakı ölkəmizin ərazi bütövlüyü məsələsinə Azərbaycan Respublikasının ərazi bütövlüyü məsələsində tərəfdaşların bizim tərəfimizdən saydığı hörmətlə yanaşmalıdır” – deyə o, əlavə edib.
İlk öncə demarş nə deməkdir onu əsaslandıraq. Fransız sözü olan bu diplomatik termin, müqabil tərəfin güzəştə getməsinə nail olmaq üçün edilən təşəbbüs, çıxış, hərəkət və ya tədbir deməkdir.
Qeyd edək ki, Rusiyanın bunu istənilən bir dövlətə bildirmək hüququ var. Sadəcə məsələ ondadır ki, bunu edərkən sağlam əsaslarla çıxış etmək lazımdır, bu cür gülməli arqumentlərlə deyil.
Azərbaycan Respublikasının mövqeyi tamamilə əsaslandırılmış və şəffaf şəkildədir.
"Azərbaycan və Ukrayna bir-birinin suverenliyini, ərazi bütövlüyünü tanıyır və dəstəkləyir. Bundan irəli gələrək Azərbaycan bəyan edir ki, Ukrayna ərazisində istənilən seçki bu dövlətin Konstitusiyasına və qanunvericiliyinə uyğun keçirilərsə, legitim ola bilər", - bəyanatda deyilir.
Mariya xanım və Kreml anlamalıdır ki, özü işğal qurbanı olan bir ölkə heç bir şəkildə, buna bənzər daha bir şeyi qəbul edə bilməz. Azərbaycana müdaxilə etmək istəyini daha əsaslı bir şəkildə nümayiş etdirilə bilərdi.
Bu sadəcə “kağızdan oxuyan robotların” – rus diplomatlarının çöküşünün bariz nümunəsidir. Təəssüflər olsun ki, vaxtılə Rusiyanın ən dar vəziyyətində ölkənin xilasedicisi olan diplomatlar indi sadəcə Kremlin mövqeyini nümayiş etdirən anons aparatları olublar.
Məsələ ilə bağlı Ednews – a müsahibəsində keçmiş ASDP – nin sədri və politoloq Zərdüşt Əlizadə, bunun sadəcə Rusiyanın siyasi maraqlarını diktə etmək üçün söylədiyini vurğulayıb:
“Rusiya istəyir ki, mütləq hakim kimi ətrafındakı bütün dövlətlərə və onların siyasi kursuna diktə etsin. Bu isə əlbəttə ki, alınmır. Sözsüz elə dövlətlər var ki, Rusiyadan qorxur və ondan birbaşa olaraq aslıdır. Lakin Azərbaycan elə bir dövlət deyil. Azərbaycan maliyyə baxımından müstəqildir, güclü ordusu var və müstəqil siyasət yeridərək öz maraqlarına xidmət etməyi bacarır. Ona görə Rusiyanın bizə nəyi etməli və ya nəyi etməməli olduğumuzu deməyə haqqı yoxdur. Sadəcə Maria xanım kimi şəxslərin vəzifə borclarıdır ki, Rusiyanın mövqeyini bildirsinlər. Ölkəmizin XİN – in vəzifəsi isə bu cür əsassız fikirləri nəzərə almamaqdır”.
Politoloq İlqar Vəlizadə isə bu açıqlamanın tamamilə əsassız olduğunu vurğulayıb:
“Biz həmişə Ukraynanın suverenliyini və ərazi bütövlüyünü dəstəkləmişik. Bu fakt Rusiya üçün sirr deyil. Ona görə biz də ənənəvi siyasətimizi davam etdirərək bunu bir daha təsdiqlədik. Maraqlısı ondadır ki, Rusiyanın ən yaxın müttəfiqi Belarus belə bu seçkiləri tanımadı. Bu seçkilərini tanıyan ölkələr ya Rusiyanın bunun kimi yaratdığı qondarma respublikalardır, ya da dünya ölkələri tərəfindən hər zaman tənqid olunan və dünya siyasətindən təcrid olmuş Şimali Koreya və Nikaraquadır. Sadəcə məsələ ondadır ki, bu qondarma respublikaları tanımayan ölkələr yalnız bəyanat verməyiblər. Bizim ölkəmizdə mövcud vəziyyət və həmçinin Ukrayna ilə bir neçə siyasi – iqtisadi platformada əlaqələrin qurulmasını nəzərə alaraq bu qərarı almışıq. Rusiya anlamalıdır ki, burada qeyri – adi bir şey yoxdur”.
Əkbər Novruz
