Xəbər verdiyimiz kimi, Rusiya sülhməramlı qüvvələri Kəlbəcər rayonunda yerləşən alban məbədi Xudavəng monastrının ərasini tərk edib. Bununla da kontingentin Azərbaycan ərazisini tərk etməsinin yeni mərhələsi başlayıb.

Rusların Qarabağı tərk etməsi Azərbaycanın növbəti uğuru hesab etmək olarmı?

Gündəm mövzusu ilə bağlı Beynəlxalq Avrasiya Mətbuat Fondunun prezidenti Umud Mirzəyev Ednews-a açıqlaması zamanı bildirdi ki, Rusiya sühməramlı kontingentinin Qarabağı tərk etməsi tarixi hadisədir. Onun sözlərinə görə, rus ordusunun Azərbaycan ərazisini tamamilə tərk etməsi 2020-ci ilin sonunda imzalanan birgə bəyanatda öz əksini tapıb:

“Baxmayaraq ki, beynəlxalq müşahidəçilər, ekspertlər, bizi istəyənlər və istəməyənlər arasında da belə bir hadisənin tezliklə baş verəcəyinə çox ehtiyatla, şübhə ilə yanaşırdılar. Amma bir vətəndaş olaraq xalqımıza, millətimizə, ordumuza və Azərbaycan liderinə güvənən biri kimi həmişə bu hadisənin baş verəcəyini anbaan gözləyirdim. Şükürlər olsun ki, bu günləri də yaşamaqdayıq. Bu həm də Rusiya sülhməramlılarının reallıqları dəyərləndirib, ondan sonra qərar verməsidir. Onlar regiondakı hadisələri,  mövcud vəziyyəti hər kəsdən yaxşı dəyərləndirirlər. Çünki onlar prosesin, reallığın, hadisələrin içindədirlər. Onlar reallıqdan çıxış edib fərqinə vardılar ki, rusiya ordusunun burada hər hansı bir görəvi qalmayıb. Tarixi bir ədalət, beynəlxalq hüquq var. Rusiya sülhməramlılarının Azərbaycanı tərk etməsi  İkinci Qarabağ müharibəsindən, o cümlədən Qarabağda separatizmə son qoyduqdan sonra növbəti qələbəmiz hesab etmək olar". 

Xatırladaq ki, Rusiya sülhməramlı kontingenti 2020-ci il 10 noyabrda Azərbaycan, Rusiya və Ermənistan liderləri arasında imzalanmış üçtərəfli Bəyanatdan sonra Qarabağda müvəqqəti yerləşdirilmişdi.

Oğuz