Avropa İttifaqının Xarici Siyasət üzrə Ali Nümayəndəsi Josep Borrell bildirib ki, İsrail Qəzzada aclıqdan silah kimi istifadə edir.
Ednews bbc.com-a istinadən xəbər verir ki, BMT xəbərdarlıq edir ki, Qəzza əhalisinin dörddə biri hər an aclıqla üzləşə bilər
Borrell bölgəyə kifayət qədər ərzaq yardımının edilməməsini "texnogen fəlakət" kimi qiymətləndirib.
Qəzzaya yardım aparan İspaniya gəmisi bu həftə 200 ton ərzaq yükü ilə Kiprdən yola çıxsa da, Birləşmiş Millətlər Təşkilatı bildirir ki, dəniz vasitəsilə edilən yardım qurudan edilən yardımı əvəz edə bilməz.
Humanitar yardımın Qəzzaya daxil olmasının ən sürətli və təsirli yolu qurudandır. Bununla belə, yardım təşkilatları İsrailin məhdudiyyətləri səbəbindən ehtiyac duyulan yardımın yalnız kiçik bir hissəsinin bölgəyə daxil ola biləcəyini bildirir.
İsrail isə Qəzzada baş verən qıtlığa görə məsuliyyət daşımadıqlarını müdafiə edir və yardımların Misirlə sərhəd qapısından keçməsinə icazə verdiyini bildirir.
Birləşmiş Millətlər Təşkilatı həmçinin Qəzza əhalisinin dörddə birini təşkil edən ən azı 576 min insanın hər an aclıqla üzləşə biləcəyi barədə xəbərdarlıq edib.
Qəzzada HƏMAS-ın nəzarətində olan Səhiyyə Nazirliyi son iki həftədə əksəriyyəti uşaq olmaqla ən az 27 nəfərin qidalanma və susuzluq səbəbiylə xəstəxanalarda öldüyünü açıqlayıb.
İspan gəmisinin Qəzzaya gətirəcəyi yardımın sahildən boşaldılması üçün obyektin yaradılması istiqamətində də səylər davam edir.
Britaniyanın xarici işlər naziri David Cameron İsraili Qəzzaya dəniz yolu ilə göndərilən yardım üçün üç böyük limanından biri olan Aşdodu açmağa çağırıb.
ABŞ, Qətər və Misirin vasitəçiliyi ilə həftələrdir davam edən danışıqlarda atəşkəs və ya girovların azad edilməsi ilə bağlı heç bir irəliləyiş olmayıb.
Xəyal Ramiz