Məktəbli olanda gündə bir qıza aşiq olurdum. Utancaq və cəsarətsiz olduğumdan qarşılarına çıxanda dilim topuq vururdu. Bir dəfə cəsarətimi yığıb aşağı sinifdə oxuyan qarabuğdayı, qıvırcıq saçlı qıza məktub yazdım. Məktubu sinif qızlarından biri apardı. Qayıdanda üzündə güllər açırdı, dedi, qız məktubu göydə qapdı. Xəyal qurdum ki, artıq məhəbbət yaşayırıq. Sevindim ki, mənim də sevgilim olacaq.
Bir saat keçmədi, qızdan cavab məktubu gəldi: "Mən səni ilk gördüyüm gündən bəyənirəm, amma məni qabaqladın. Beşinci mərtəbədə səni gözləyəcəm. Gəl, söhbət edək”. Məktubu oxuyanda elə bildim, ürəyim yerindən çıxacaq; əlim, ayağım buz kəsdi, dediyi yerə gedə bilmədim. Bu mənasız həyəcanı içimdə öldürə bilsəm, qızlarla münasibətim alınacaqdı, amma bacarmırdım.
Məktəbi bitirəndən sonra qızlarla münasibətim düzəldi. Onlara laqeyd, soyuq münasibət göstərdikcə özləri mənimlə tanış olmağa başlayırdı. Beləcə qızları tanımaq zamanı yetişmişdi. Onları tanımağa başlayanda bir də gördüm evlənmişəm. Bir qızım oldu. O gündən qızlarla münasibətimin finiş xəttinə çatmışdım.
Qızım doğulanda şəhərə yağış yağırdı. Doğum evində qadınların əzablı səsləri yağışa qarışırdı. Pəncərənin kandarında siqareti siqaretə calayır, sənin gəlişini gözləyirdim. Mənə ata deyən bir qızın böyüyəcəyinin xəyalını qurmağa başlamışdım. Bir yandan da içimdə şeir doğulurdu. Kimə bənzəyəcəksən? Burnun yekəmi olacaq? Saçların nə rəng olacaq? Gözlərin mənim kimi böyükmü olacaq? Suallar yağış damlaları kimi üzərimə yağırdı. Gecənin ikiyə bölündüyü vaxt sən gəldin. Yür kürəsinə qondu sərçə ayaqların.
Bağçaya getdiyin günlər sənin üçün ən əzablı günlər olurdu. Oranın yolunu uzaqdan görəndə belə totuq dabanın topuq vurudu. Uşaq vaxtlarımda mən də bağçadan qorxur, adını eşidən kimi rəngim saralırdı. Çünki orda müəllimlər yatmadığıma görə məni nar çubuğu ilə döyürdülər. Süd içmədiyimə görə danlanırdım. Qızım, sən də nə uşaqlara qoşula bilir, nə də müəllimlərini sevirsən. Azad və mutlu olduğun sahə mənim və ananın qucaq ərazisidir.
Bu gün mənim yeganə qız sevgilim qızımdır.
Bu gün "Beynəlxalq Qızlar Günü”dür. Günün keçirilməsində əsas məqsəd diqqəti qızların hüquqlarının müdafiəsinə, oğlan və qızlar arasında gender bərabərliyinin təmin olunmasına yönəltməkdir.
Qızları çox sevirəm. Həmcinslərimdən çox vaxt qaçmışam. Sığındığım onlar olub.
Gözəl şairimiz Eldar baxışın dediyi kimi:
İlahi, mənə yox, mən istəmirəm,
İlahi, yazığın gəlsin bu qıza.
Elə eləmə ki,
oğlanlar, qızlar,
Kişilər, arvadlar gülsün bu qıza.
Elə eləmə ki,
vüsal yerinə
Göz yaşı danışsın, qəhər danışsın.
Bir qızdan bir bölük adam danışsın,
Bir qızdan bir böyük şəhər danışsın.
Elə eləmə ki, bu qız bu eldə,
Dilə-dişə düşsün məndən ötəri…
Sərçə balasıdı bu qız bu saat…
